3 خطوات يساعدوك تعدي تحدي تجهيز اوضة الاطفال

تجهيز أوضة الاطفال يعتبر تحدي كبير، لأن الأطفال بيمرو بمراحل نمو مختلفة كتير وكلها بتيجي بسرعة ورا بعض.

فبتبقى حيرة كبيرة نجهز الأوضة لبيبي ولا طفل في عمر الـ 10 سنين ولا نجهِزها مرة واحدة لطفل داخل على 14 أو 15 سنة ؟!

طبعا العامل الأكبر عشان نجاوب على السؤال ده هو خطتكم أنتم!

 يعني لو أنتم في خطتكم ناويين تجددو في ديكور وعفش البيت كل كام سنة، أو البيت مثلا إيجار وعاملين حسابكم انكم تتنقلو كمان كام سنة لبيت تاني ، يبقى الأفضل هنا تمشي بالمراحل العمرية بتاعت الأطفال وتختار الأثاث على الأساس ده ومتشغلش بالك بالمستقبل أوي.

الاحتمال التاني إنه العفش هيفضل معاكم علطوووول فهنا أنت بتدور على حاجة عمرها طويل تستحمل وقت كتير أو حاجة تستوعب كل مراحل طفلك العمرية مرة واحدة، و دي مش سهل إنك تلاقيها أوي.

الأفضل في الاحتمالين بقى إنك تراعي المراحل العمرية بتاعت الأطفال يعني الأثاث في أوضتهم شكله وستايله يناسب حجمهم وسنهم علشان يتعودو يعتمدو فيها على نفسهم ، وكمان يحسو إنها مناسبة ليهم وبتحاكي اهتمامتهم العمرية.

خلاص قررت حتمشى فى أنه خطه؟

 تعالى نشوف بقه أيه الحاجات اللى بنركز فيها وإحنا بنجهز أوضة الأطفال :

1. نحاول نخلي الأوضه مرحه ومبهجه بألوان وشخصيات الكرتون المفضلة لاطفالك ، ثيم الاوضه ممكن يتعمل فى ورق الحيطة أو ستيكرات للحيطة باشخاص الكرتون المختلفة ، و في الستاير المبهجه وفى ملايات السرير وحته الالحفه، خلى أوضة طفلك جنة اللعب بالنسباله.

2. نراعي إن الأثاث ميبقاش واخد كل مساحة الاوضة ، يعني نقيس مساحة الأوضة بعد ما نحدد الـ Theme وعلى أساسه نحدد قطع الأثاث اللي هنحطها في الاوضة بحيث إنه يبقى في مساحة واسعة للأطفال يلعبو فيها على الارض بألعابهم ، والافضل زيي ما فى كتير من الاباء بيعملو إنك تجيب السرير اللى بدورين ، اولا لان الاطفال بتحبه وبينمي خيالهم فى اللعب وعمل الخطط، وكمان بيوفر المساحه اللازمه للعب والتنطيط .

3. مستلزمات الاطفال كتير بالهبل ، من لعب و هدوم وبامبرز لو هم لسه صغيرين، فهتحتاج مساحة تخزين مش قليلة، خد بالك من النقطة دي وأنت بتختار الأثاث بحيث يكون فيه مساحات تخزين خفية زى مثلا أدراج فى قلب السرير و تحدد مكان لدولاب أو باسكت للعب وأنت بتقسم مساحة الاوضة.

 دي أهم الحاجات اللي محتاج تراعيها وأنت بتجهز اوضة الاطفال .

ولو عايز تتفرج على أشكال أوض الأطفال اللي متاحة في محلات مصر و تعرف أسعارها علشان تتخيل و تقدر تقرر اللي يناسبك أكتر أدخل على اللينك ده وأنت تشوف اوض الاطفال في محلات مصر بأشكالها واسعارها المختلفة .

6 خطوات لاختيار غرفة السفرة اللي تناسبك - اعرف إزاي تختار السفرة صح

اوضة السفرة مش زيي الليفنج و اوضة النوم من ناحية إننا مبنقضيش فيها وقت كتير ، فعلشان كده كتير مبيهتمش بيها ولا بيركز في اختيارها ، يعني ده مش معناه إننا نهملها وعلشان الموضوع يكون سهل ، في 6 خطوات بالظبط يساعدوك تختار اوضة السفرة صح من غير ما تشغل بالك كتير.

 6 خطوات ناخد بالنا إننا نجهزاوضة السفرة بيهم :

1. نشوف مساحة أوضة السفرة أد ايه قبل ما نتبدي نقرر أو نخطط أي حاجة.
2. نحدد عدد الناس اللي ممكن تقعد على السفرة أد أيه، وأنت عيلتك صغيرة ولا كبيرة ، وعدد الضيوف فى العزومات اد ايه .
3. على حسب مساحة الأوضة هتختار حجم الترابيزة وشكلها إذا كان هيبقى مستطيل ، مربع، أو دايرة؛ كمان على حسب عدد الناس اللي ممكن يقعدو على السفرة هتختار شكل الكراسي وحجمها ، يعني لو بتفرش مودرن مثلا وعندك ناس كتير ممكن تستقبلها, والمساحة مش مساعدة فممكن تختار ستايل السفرة اللي بتبقى ببينشات بحيث إنها متبقاش محكومة بعدد أشخاص.
4. نيجى لفقرة النيش المقدسه واللى معظم الناس بتدعو للتخلص منه دلوقتى، فلو انتى من العائلات اللى شايفه النيش ضرورى لازم نراعى حجم الاوضه ومساحه النيش لو النيش بالنسبالك ملوش لزمه يبقى ممكن تستبدليه بالبوفية.
5. بعد ما نحدد كل ده نكتبه في ذات نفس النوتبوك اللي كنا كتبنا فيها مواصفات ومساحة اوضة النوم والليفنج وننزل نشتري اللي بيناسب المواصفات دي.
6. واخيرا وأنت بتشتري محدش قال إنك لازم تشتري الأوضة على بعضها ، ممكن تجمع أنت أوضة سفرة على مزاجك بألوان و كراسي مختلفة.

وممكن تاخد فكرة عن السفرة الموجودة في محلات مصر باسعارها وازاي توصل للمحل من اللينك ده اوض السفرة من محلات مصر

و دلوقتي دور الصور اللي تديك فكرة عن اوضة السفرة:

أجدد تقسيمة للساعات تساعدك تعرف إزاي تختار ساعة حائط تناسب بيتك

الساعات و خصوصا ساعات الحوائط اللي بتبقى متشافة وظاهرة بوضوح على الحيطة لازم ناخد بالنا من ستايل الفرش وأحنا بنختارها.
ايوووووة حتى الساعات كمان ليها ستايل، اشمعنى هى يعنى :)

وطبعا بما إن الموضوع ده مش  بيجى فى دماغنا ولا نعرف إنه موجود أصلا بنهادي بساعات بتعجبنا شكلها وخلاص من غير ما نركز البيت اللى حنهاديله ستايله أيه أو نركز إننا نجيب النيو كلاسيك اللى تمشى مع كل الستايلات :)

من الآخر ، حتى الهدايا أبقى اتخابث كده قبلها وأسال أنتوا فارشين البيت صحيح أنه ستايل :)

طيب نرجع تاني لستايلات الساعات ونتكلم عليهم بالتفصيل، أيوة هي نفس التقسيمة (كلاسيك، مودرن، نيوكلاسيك)

الساعات الكلاسيك: هي الساعة اللي كانت عندك زمان ببندول رايح جاي دي ، و عادة يا بتبقى خشب يا معدن و بيكون عليها زخرفة و نقوشات بتديها فخامة.

الساعات المودرن: حاليا الافتكاس فيها كتير  أوي ، العلامة الوحيدة اللي ممكن تعرف بيها أصلا إنها ساعة هي وجود عقارب الساعة اللي مينفعش تشتغل من غيرها :D

الساعات النيو كلاسيك: دي بتميل للتقليدية اكتر من الافتكاس بس في نفس الوقت بتكون بسيطة ومفهاش الزخرفة و الشغل الكتير اللي بيبقى في الكلاسيك، أغلب أشكالها بتبقى المدورة أو المستطيلة و بتبعد عن اللون الدهبي.

زيي ما متعودين إن الصورة بألف كلمة ، فنتفرج على الصور علشان نفرق أكتر بين الستايلات.

و لو بتدور على ساعة هدية أو لبيتك و عايز تعرف هتلاقي الستايل اللي يناسبك فين، أدخل هنا واختار ساعة تناسب ستايل بيتك إن كان مودرن أو كلاسيك أو نيو كلاسيك من محلات مصر

احدث انواع ديكورات الحوائط - دهانات و تشطيبات نهائية بيتم استخدمها حاليا

ستايلات الأثاث و الفرش من مودرن و كلاسيك و نيو كلاسيك بتحددلنا هنختار نوع التشطيبات النهائي للحوائط بيكون أيه، علشان كده محتاجين إننا نعرف أشهر أنواع التشطيبات النهائية للحوائط و التشطيبات دي بتناسب ستايلات أيه؟

احدث أنواع التشطيبات النهائية للحيطان اللي هتختار منها - ودي بيسموها تشطيبات ديكورية أو فينيش علشان هي آخر حاجة بتدي شكل الحيطة النهائية- هي  :

1. الفلفت Velvetوده الدهان اللي بيبقى بأشكال نقوشات على الحيطة ومنتشر جدا في بيوت كتير حاليا، ده بيمشي غالبا مع الستايل الكلاسيك و النيو كلاسيك و ميفضلش إنه يتحط مع المودرن إلا إذا كانت الدنيا سادة خالص ومحتاجين نضيف باترن قوية.

2. تكسيات طوب أو بلاط ، دي مش جمع تاكسي :)  دي التسمية اللي بيقولها المتخصصين في شغل النقاشة،  و التكسيات دي بتكون مناسبة اكتر للستايل الكلاسيك، وفي أشكال منها بسيطة بتمشي مع المودرن :)

3. الوول بيبر لأنه من أشهر التشطيبات النهائية اللي رجع يبقى موضة تاني، وفي منه أشكال كتير تناسب المودرن والكلاسيك، و الجديد منه الأشكال اللي طالعة ثري دي بتدي لوك حلو جدا للحيطة.

4. التاتو ، و ده بيبقى أنسب للستايل المودرن لأنه بيبقى بسيط وفي خروج عن المألوف يعني مبيمشيش مع قواعد الكلاسيك :)

5. تجليد الحيطان وده بيدي اللوك بتاع ورق الحائط والجديد فيه إن معظم شغله ثري دي وبيبقى مناسب اكتر للستايل المودرن.

6. الدهانات اللي بتدي شكل نجوم بتلمع على الحيطان ، ودي اسمها بيختلف من شركة لشركة وملهاش اسم ثابت نقدر نقوله غير اللي موجود على متلفش "دهانات ميراج" :)

دي أشهر أنواع تشطيبات الديكور للحيطة ، وفي نقطة عايزين نتفق عليها هنا ، كل التشطيبات اللي كتبناها فوق دي الأفضل إنها تتعمل في حيطة واحدة بس في الاوضة ، لو زاد عن كده حتقلل جمالها وحتزود الاحساس بالزحمه والبهرجه :)

 ومننسااااااش نعمل حساب ستايل الفرش قبل ما نختار نوع التشطيب المناسب.

ممكن تتفرج على احدث الدهانات الموجودة حاليا في محلات التشطيبات في مصر من هنا و كمان تعرف أسعارها و أنت في البيت 
كل اللي المفروض تعمله إنك تضغط هنا

إزاي توزع الأثاث في غرفة المعيشة اللي مساحتها مربعة صغيرة

غرفة المعيشة مكان بنقضي فيه وقت كتير ، علشان كده بنهتم بإزاي نختارله أثاث شكله حلو و يبقى مريح في نفس الوقت ، لكن احيانا بتطلعنا عوائق منعرفش بسببها نختار الأثاث أو شكل الديكور اللي يخلي اوضة المعيشة او الليفنج زيي ما بنتخيل تكون بالظبط، هنتكلم عن احد أشكال الليفنج و أزاي توزع العفش او الأثاث فيه، هنناقش دلوقتي التعامل مع  المربع اللى مساحته صغيره وازاى نوزع فيه العفش :)

1.       الافضل إنك لما تختار العفش هنا ميكنش كبير ، بس في نفس الوقت استخدام أثاث كبير بردو بيضيف لمساحة الاوضة، أكيد طبعا بتقول في بالك ايه ده احنا هنبتديها بأنكم بتغيرو كلامكم في نفس الجملة؟! 

لا ملحقناش نغير كلامنا ، المقصود إن قطعة أثاث واحدة نختارها كبيرة ودي ممكن تكون الكنبة مثلا وباقي القطع تكون حجمها أصغر بس مش أصغر أوي ، يعني نراعي إنه يكون في نسبة وتناسب بين قطع الاثاث J

2.       الألواااان والباترن J الألوان و وجود باترن في العفش بيضيف بُعد جديد للأوضة بيدي إحساس إنها أوسع ، علشان كده قوى قلبك ومتخليش الاوضه كلها لون هادي واحد وخلاص، بالعكس وجود باترن وألوان كتير بيساعد J

3.       المكتبة مش بس للي بيحب يقرا، المكتبه ممكن تعمل معاك أحلى شغل فى إنها  تضيف لمساحة الاوضة لأنها بتوضح طول الحيطة وبتحسسك إنها أبعد ، وكمان مكان كويس كرفوف للتخزين وإضافة ديكورات للاوضة J طيب لو الدنيا مزنقة أووي وفعلا مش لاقي حتة أحط فيها مكتبة؟ بسيطة J أعمل رفوف بنفسك شويه الواح خشب ومسامير وتدى منظر فى الحيطه اللى مش مستخدمه ، وتقدر تحط فيها الكتب أو التحف لستات البيوت اللى غاوين انتيكا J

4.       الستاير ،  الستاير هتضيف طول للحيطان وتحسسك إن السقف أبعد وده بشرط ،  إنك تعلقها قريب أووي من السقف على أد ما تقدر J

نشوف الصور الجاية علشان ناخد فكرة اوضح عن تنفيذ الكلام اللي قلناه فوق ، ولو عايزين تشوفو أشكال غرفة المعيشة وستايلاتها الموجودة في محلات الموبيليا في مصر تقدرو تدوسو على اللينك ده وتعرفو  أوض المعيشة الموجودة في محلات مصر بصور حقيقية متاخدة من المحلات