إزاي توزع الأثاث في غرفة المعيشة اللي مساحتها مربعة صغيرة

غرفة المعيشة مكان بنقضي فيه وقت كتير ، علشان كده بنهتم بإزاي نختارله أثاث شكله حلو و يبقى مريح في نفس الوقت ، لكن احيانا بتطلعنا عوائق منعرفش بسببها نختار الأثاث أو شكل الديكور اللي يخلي اوضة المعيشة او الليفنج زيي ما بنتخيل تكون بالظبط، هنتكلم عن احد أشكال الليفنج و أزاي توزع العفش او الأثاث فيه، هنناقش دلوقتي التعامل مع  المربع اللى مساحته صغيره وازاى نوزع فيه العفش :)

1.       الافضل إنك لما تختار العفش هنا ميكنش كبير ، بس في نفس الوقت استخدام أثاث كبير بردو بيضيف لمساحة الاوضة، أكيد طبعا بتقول في بالك ايه ده احنا هنبتديها بأنكم بتغيرو كلامكم في نفس الجملة؟! 

لا ملحقناش نغير كلامنا ، المقصود إن قطعة أثاث واحدة نختارها كبيرة ودي ممكن تكون الكنبة مثلا وباقي القطع تكون حجمها أصغر بس مش أصغر أوي ، يعني نراعي إنه يكون في نسبة وتناسب بين قطع الاثاث J

2.       الألواااان والباترن J الألوان و وجود باترن في العفش بيضيف بُعد جديد للأوضة بيدي إحساس إنها أوسع ، علشان كده قوى قلبك ومتخليش الاوضه كلها لون هادي واحد وخلاص، بالعكس وجود باترن وألوان كتير بيساعد J

3.       المكتبة مش بس للي بيحب يقرا، المكتبه ممكن تعمل معاك أحلى شغل فى إنها  تضيف لمساحة الاوضة لأنها بتوضح طول الحيطة وبتحسسك إنها أبعد ، وكمان مكان كويس كرفوف للتخزين وإضافة ديكورات للاوضة J طيب لو الدنيا مزنقة أووي وفعلا مش لاقي حتة أحط فيها مكتبة؟ بسيطة J أعمل رفوف بنفسك شويه الواح خشب ومسامير وتدى منظر فى الحيطه اللى مش مستخدمه ، وتقدر تحط فيها الكتب أو التحف لستات البيوت اللى غاوين انتيكا J

4.       الستاير ،  الستاير هتضيف طول للحيطان وتحسسك إن السقف أبعد وده بشرط ،  إنك تعلقها قريب أووي من السقف على أد ما تقدر J

نشوف الصور الجاية علشان ناخد فكرة اوضح عن تنفيذ الكلام اللي قلناه فوق ، ولو عايزين تشوفو أشكال غرفة المعيشة وستايلاتها الموجودة في محلات الموبيليا في مصر تقدرو تدوسو على اللينك ده وتعرفو  أوض المعيشة الموجودة في محلات مصر بصور حقيقية متاخدة من المحلات

احدث تقسيمة لستايلات مفروشات أوضة النوم

النهارده هنتكلم على ستايلات حاجه المصريين بيحبوا يشتروها حتى لو اول ما البنت تتولد عشان الأمهات تشيلها لبنتها فى الجهاز..  ايوووون  عليكوا نور مفارش السرير :)

بس اللى متعرفوش الامهات إن كمان مفارش السرير ستايلات والأول تشوفى بيتك أنه ستايل عشان تحددى حتجيبى المفرش أنه ستايل ، نكلم عل الستايلات ونشوف اللى المفروض ناخد بالنا منه:

نفس تقسيمتنا المعهودة هنلاقيها في ستايلات مفارش أوض النوم (كلاسيك – مودرن - نيوكلاسيك)

-          كلاسيك: ممكن تكون بتلمع، و عادة بتكون منقوشة بنقوشات كتييير أوي والنقوشات دي حجمها صغير وأحيانا بيبقى فيها أكتر من باترن. (افتكري هنا مفرش العروسة أبو دانتيل و فصوص) 

-          المودرن بقى كعادته بيسمعك رنين الصمت  يعني هادي ومفيهوش دوشة كتير ، عادة بتبقى المفارش هنا سادة أو مقلمة، كمان ممكن تكون عليه رسمة بسيطة لأشكال هندسية مربعات أو زجزاج وبتبقى كبيرة ومش متكررة كتير.

    - النيو كلاسيك زيي عوايده بيجمع حلاوة المودرن والكلاسيك مع بعض، هتلاقيه فيه نقوشات بس كبيرة فتحسيها هادية ومريحة لعينك.

طب ايه بقه اللى ناخد بالنا منه ؟

أولاااا : لو اخترتي مفارش منقوشة الافضل إن الملايات تكون سادة ومش منقوشة ، وهنا خديها كأنك بتظبطي لبسك بالظبط يعني كانك لابسه بلوزه منقوشه فبتجيبلها طرحه ساده J عشان منقوش على منقوش ميجوزش .

ثانياااا: ممكن تكون اوضة النوم تحسيها لون واحد بس اللعب باختيار مفرش السرير والستاير ممكن يخليها اجمل مما تتخيلي، نفس ذات النظريه  بتاعة انك لابسه لبس لون واحد بس تروحى حطه اكسسوار تنطق الطقم وتخليه اخر شياكه.

ثالثا: عشان مودرن وكلاسيك طول عمرهم قافشين على بعض والوحيد اللى بيصلح بينهم هو النيو كلاسيك J لو بيتك مودرن مينفعش تجيبى مفرش كلاسيك اللى بيبقى فيه دانتيل وفصوص ده .

واخيييرا نختم بإن  الكوفرتات بتتعامل معاملة مفرش السرير J يعني لازم نراعي واحنا بنختارها ستايل الفرش والوانه J

ممكن تختاري المفروشات وتتفرجي على الموجود في المحلات وانتي في البيت لو دخلتي على اللينك ده علشان تعرفي ستايلات و موديلات مفروشات اوضة النوم الموجودة في المحلات

ودلوقتي نتفرج على الصور ونطبق اللي اتعلمناه :) 

غرف أطفال بأشكال جديدة ومختلفة في 2015

من الاماكن اللي بننسى نهتم بشكلها وممكن نختارلها اي أثاث والسلام هي اوضة الاطفال، ده بيبقى راجع لاسباب كتير منها الحيرة وقلة الوقت . علشان كده جمعنا ليكم مجموعة افكار لاشكال جديدة وغير تقليدية لاوضة الاطفال :)

الصور فيها افكار كتير ممكن تطلع منها بحاجة مختلفة تناسبك :)

ولو بتدورو على اوضة اطفال وعايزين تشوفو المحلات فيها ايه ممكن تدوسوعلى اللينك ده وتعرفو جديد اوض الاطفال الموجودة في محلات مصر

احدث تقسيمة لانواع و ستايلات النجف

ستايلات النجف 

هم نفس التلت تقسيمات كلاسيك و مودرن ونيوكلاسيك.

بس يا ترى النجف شكله ايه في كل ستايل من التلاتة؟

بالنسبة للكلاسيك : هتعلميه بإنه لونه بيبقى دهبي عادة والشكل التقليدي للنجف المعدن اللي بيبقى فيه كريستال و موجود في صالونات بيوت كتير مننا :)

المودرن : يعني الابداع و الخروج عن المألوف :) 

 مش هتلاقيله شكل ثابت بس هتعرفي تميزيه بسهولة لأنه بيكون واخد اي اشكال حلزونية مبهمة ملهاش توصيف و منحنيات او مربعات ، كلها لعب بالاشكال الهندسية مع المحافظة على ميزة المودرن اللي هي البساطة :)

ومش بيبقى دهبي خااااالص فمش هتتلخبطي بينه وبين الكلاسيك متقلقيش :)

النيو كلاسيك بقى: ده كالعادة هو الخلاط اللي بندمج فيه المودرن مع الكلاسيك فهتلاقي فيه اللمسة الفخمة بتاعت الكلاسيك مع جنان وبساطة المودرن، لونه عادة بيبقى فضي . على فكرة ممكن تلاقي نجفتين شكلهم قريب من بعض جدا واحدة فضي والتانية دهبي فساعتها هتعرفي انه الفضي نيو كلاسيك والدهبي كلاسيك :) بردو الكريستال هتلاقيه هنا داخل مع الفضي بطرق جديدة في احيان كتير :)

ملحوظة كده في السريع :)

-          مينفعش تحطي كلاسيك مع المودرن بأي شكل من الاشكال أو العكس ، لو حابة تدمجي ستايلين فممكن يكون نيو كلاسيك مع الكلاسيك لوحده او مع المودرن لكن مينفعش مودرن وكلاسيك.

 دلوقتي دور الصور تتفرجي عليها وتطلعي المودرن والكلاسيك والنيوكلاسيك 

J 

ولو بتدوري على نجف للشرا ممكن تدخلي على اللينك ده وتشوفي نجف من الستايل اللي يناسبك دوسي هنا :)